Gagnlegur fróðleikur um notkun á HEIMAPIZZA deiginu

• HEIMAPIZZA deigið er hágæða pizzudeig. Það inniheldur hveiti, vatn, matarolíu, sykur, salt og ger en í því eru engin auka- eða hjálparefni.
• HEIMAPIZZA deigið er lifandi deig með virkum brauðgerlum. Eins og með alla lifandi hluti þá tekur ákveðinn tíma fyrir deigið að ná réttum þroska. 
• HEIMAPIZZA deigið inniheldur mjög lítið af geri og er því lengur að þroskast en hefðbundið deig. En góðir hlutir gerast hægt og ef neðangreindum leiðbeiningum er fylgt þá verður þú ekki svikin/n.
• Deigið þarf að geyma í upprunalegu íláti í ísskáp við 2-4°C þar til skömmu áður en það er notað. Lokið skal ávallt vera á öskjunni til að koma í veg fyrir ofþornun. Deigið má alls ekki frysta.
• Rétt þroskað deig er mun bragðbetra, lyftir sér betur, bakast betur, myndar fallegri skorpu og gefur frá sér betri ilm en óþroskað deig. Það er einnig mun auðveldara að vinna með deig sem er rétt þroskað.
• HEIMAPIZZA deigið er best 4-7 dögum eftir framleiðslu, en það er hægt að nota það 3-9 dögum frá framleiðslu. Ef verið er að nota þriggja daga gamalt deig er best að taka það út úr ísskáp og láta það standa við stofuhita í u.þ.b 2½ klst. áður en það er bakað. Eftir því sem deigið verður eldra skal stytta tímann sem það stendur úti um u.þ.b ½ klst. fyrir hvern dag. Fjögurra daga gamalt deig skal því standa úti í 2 klst., fimm daga gamalt deig í 1½ klst. osfrv.
• Stráðu maískurli eða hveiti á borðið þar sem pizzan er flött út, til að hún festist ekki við borðið.
• Best er að nota hendurnar við að fletja pizzuna úr, en það er einnig hægt að nota kökukefli. Reyndu að hafa pizzuna sem jafnasta á þykkt.
• Forðastu að henda pizzunni upp í loft, því það þynnir miðjuna á henni og orsakar misbökun. 
• Leggðu pizzudeigið á pizzanet eða bökunarplötu og gerðu við öll göt sem hafa myndast. Settu svo sósu á pizzuna með skeið og stráðu yfir osti.
• HEIMAPIZZA deigið er passlegt fyrir hefðbundna 12 tommu pizzu eða þunnbotna 16 tommu pizzu.
• Flestir nýir ofnar eru með sérstakri pizzastillingu og það er gott að nota hana. Ef þú hefur ekki þennan möguleika er best að baka pizzurnar á u.þ.b. 240°C undirhita neðarlega í ofninum.
• Ef stórar loftbólur myndast er gott að stinga strax á þær með gaffli.
• Leyfðu pizzunni að kólna í nokkrar mínútur áður en hún er skorin og borin fram.
• Það er gott að pensla kantinn með hvítlauksolíu strax eftir bakstur, en það gefur bæði gott bragð og mýkir kantinn.

Gagnlegur fróðleikur varðandi álegg á pizzur

Til að pizzan þín heppnist sem best er mikilvægt að hafa eftirfararandi í huga
• Á 12 tommmu pizzu er passlegt að nota um 120 g af pizzasósu. Skildu eftir um 1 cm kant út við endann og passaðu að dreifa sósunni jafnt yfir alla pizzuna. Á 16 tommu pizzu eru u.þ.b. 180 g af pizzasósu.
• Á 12 tommu pizzu er hæfilegt að nota 130-150 g af rifnum osti. Osturinn á að hylja sósuna þannig að ekki sjáist stórir rauðir flekkir. Á 16 tommu pizzu eru u.þ.b 210 g af osti hæfilegur skammtur.
• Það er mjög mikilvægt að dreifa öllum áleggjum vel og passa sérstaklega upp á að þau fari ekki öll á miðjuna. Allir bitar á öllum sneiðum eiga að vera jafn góðir og innihalda svipað magn af gómsætum áleggstegundum.
• Magn áleggja ræðst af því hve margar tegundir eru á pizzunni, en því fleiri sem tegundirnar eru, því minna þarf af hverri þeirra. Þannig tryggir þú að pizzan bakist á réttan hátt og verði ekki ofhlaðin.
Eftirfarandi niðurröðun á algengustu áleggstegundum er heppilegust fyrir góðan árangur.
Uppgefið magn miðast við 3-4 áleggstegundir á hverri pizzu.

1. Hvítlaukur er ávallt fyrsta áleggið og hann er settur beint á ostinn. Notaðu  u.þ.b. hálfan lítinn hvítlauksgeira á 12 tommu pizzu. Skerið í smáa bita eða tætið og dreifið jafnt yfir pizzuna.
2. Laukur kemur næst. Notaðu u.þ.b. 25 g, skerðu í 2-3 cm langa og 5 mm breiða bita og dreifðu vel yfir alla pizzuna.
3. Næst er paprikan sett á pizzuna. Notaðu u.þ.b. 25 g, skerðu í 2-3 cm langa og 5 mm breiða bita og dreifðu vel yfir alla pizzuna.
4. Pepperoni er alltaf fyrsta kjötáleggið. Raðaðu sneiðum þétt þannig að þær nánast snertist ef eingöngu er um að ræða pepperoni, en hafðu sístækkandi bil á milli eftir því sem áleggjum fjölgar.
5. Skinka kemur á eftir pepperoni. Það er gott að strá smá aukaosti yfir skinkuna þannig að hún verpist ekki og þorni. Fitu- og vatnsmeiri skinka bakast og bragðast betur á pizzum. Það gilda sömu lögmál um magn af skinku og pepperoni.
6. Nautakjöt. Nautahakk er steikt með svörtum pipar og Season All kryddi áður en það er sett á pizzuna.
7. Því næst koma sveppir. Ferskir sveppir bakast betur en niðursoðnir, en þeir rýrna meira við bakstur. 
8. Ananas er næstur í röðinni. Passið að láta allan aukavökva renna af ananasnum áður en hann er settur á pizzuna.
9. Næst koma ólífur, maísbaunir (gular baunir) og jalapeno.
10. Aukaostur. Það þarf að passa vel að setja alls ekki of mikinn aukaost á pizzuna, þá soðna áleggin undir ostinum í stað þess að bakast.
11. Gráðaostur, camembert, rjómaostar og þistilhjörtu – þessi álegg eru sett ofan á aukaostinn.
12. Beikon er ávallt síðasta áleggið í röðinni, enda á það að bakast og brúnast efst á pizzunni.
13. Best er að setja krydd eins og grófmalaðan svartan pipar, oregano eða annað slíkt síðast á pizzuna.